ليست ممرضه حكايات اسما السيد 2
سارة وقفت فوقه وهي بتترعش.
— أختي فين؟
سامح ضحك وهو على الأرض.
— اسألي اللي فوق.
— مين اللي فوق؟!
— اللي إنتوا كلكم بتقولوله: يا دكتور.
عمر فهم فورًا.
مدير المستشفى.
الفصل الرابع: نهى
دخلوا الممر السري.
في نهايته كانت فيه غرفة صغيرة.
لما فتحوها…
سارة وقفت مكانها.
امرأة نحيفة جدًا كانت قاعدة على الأرض.
شعرها طويل ومهمل.
وشها شاحب.
لكن الشبه بينها وبين سارة كان واضح لدرجة مرعبة.
— نهى…
المرأة رفعت عينيها.
سارة جريت عليها.
حضنتها.
الاتنين انفجروا في العياط.
— إنتِ عايشة!
نهى كانت بتلمس وش أختها كأنها مش مصدقة.
— كنت فاكرة إني مش هشوفك تاني.
— قالولي إنك موتي!
— كانوا عايزينك تصدقي كده.
عمر قرب.
— مين؟
نهى بصت له.
أول ما شافته…
اتغير وشها.
— إنت عمر؟
— تعرفيني؟
ضحكت بمرارة.
— أنا مستنياك من سنين.
سارة بصتلها بصدمة.
— إنتِ تعرفيه منين؟
نهى أشارت للملف.
— عشان الملف ده.
عمر قعد قدامها.
— أنا عايز أفهم كل حاجة.
نهى أخذت نفس طويل.
— المستشفى دي كان تحتها من سنين قسم أبحاث خاص. في البداية كان قانوني. أبحاث أمراض وراثية نادرة، تجارب علاجية، ملفات أسر.
سكتت.
— بعدين دخل الفلوس.
عمر قال:
— يعني إيه؟
— بعض الناس اكتشفوا إن المعلومات الطبية نفسها ممكن تبقى أغلى من العلاج.
— مش فاهم.
— سجلات نسب. تحاليل وراثية. أطفال اتولدوا من غير تسجيل صحيح. عائلات غنية مستعدة تدفع عشان أسرار معينة ماتطلعش.
سارة همست:
— وإنتِ عرفتي؟
نهى هزت راسها.
— كنت بشتغل في الأرشيف.
عمر سأل:
— والأطفال اللي اختفوا؟
نهى بصت له بسرعة.
— مش كلهم مخطوفين.
— يعني إيه؟
— بعض الحالات كان بيتم نقلها بشكل غير قانوني بين الأقسام علشان تتزور تقاريرها الطبية أو تتاخد منها عينات وتحاليل من غير علم أهلها. وفي حالات قديمة جدًا…
سكتت.
عمر حس إن الكلام جاي عليه.
— كملي.
نهى قالت:
— كان فيه أطفال حديثي الولادة اتبدلت ملفاتهم.
عمر بص للملف.
— وأنا واحد منهم؟
نهى ما ردتش فورًا.
ثم قالت:
— أيوه.
الصمت كان أقسى من أي صوت.
عمر فتح الملف.
— مين أمي؟
نهى مدت إيدها.
— آخر صفحة.
فتحها.
اسم امرأة.
وتحت الاسم…
صورة.
عمر تجمد.
المرأة كانت شابة.
ملامحها…
قريبة منه بشكل يخوف.
— دي أمي؟
— أيوه.
