اجازه عائليه اسما السيد 2
الفصل الرابع
فضل يبص لأمه ثواني طويلة…
كأنه لأول مرة يشوفها على حقيقتها.
قال بصوت مخنوق:
— يعني… كنتِ بتكدبي عليا كل السنين دي؟
ردت بكل برود:
— كنت بحافظ على بيتك.
ضحكت ضحكة قصيرة.
— بتحافظي على بيته؟ ولا كنتِ بتهدي جوازي حتة حتة؟
لفت ناحيتي وقال بسرعة:
— والله ما كنت أعرف.
بصيتله بثبات.
— حتى لو هنفترض إنك فعلًا ما كنتش تعرف… كنت فين لما كنت كل سنة تشوف اسم كل الناس موجود إلا اسم مراتك؟
سكت.
— فين كنت لما أمك قالت قدامي: “دي رحلة للعيلة وبس”؟
سكت.
— فين كنت لما وعدتني تلات مرات إننا هنسافر لوحدنا… وما وفيتش بوعد واحد؟
نزل راسه.
لأول مرة…
ما لقى أي مبرر.
…
أخوه قعد على الكنبة وهو ماسك راسه.
وقال لأمه بعصبية:
— إنتِ ليه عملتي كده؟
قالت بمنتهى الثقة:
— علشان الست دي دخلت بيني وبين ابني.
قلت وأنا ببصلها:
— لا يا طنط… أنا اتجوزت ابنك.
لكن إنتِ كنتِ عايزة تفضلي مراته.
شهقت أخته.
أما هي…
فاحمر وشها من الغضب.
رفعت إيدها كأنها هتضربني.
لكن ابنها مسك إيدها لأول مرة.
وقال بحزم:
— كفاية.
بصتله بصدمة.
— إنت ماسك إيدي؟!
— أيوه… لأنك غلطتي.
…
أول مرة…
من يوم جوازنا…
يقف في وش أمه.
لكن الغريب…
إني ما حسيتش بأي انتصار.
كنت متأخرة جدًا.
الكلمة دي كان لازم يقولها من تلات سنين.
مش النهارده.
…
قال وهو بيقرب مني:
— اديني فرصة أصلح كل حاجة.
ابتسمت بهدوء.
— تعرف المشكلة إيه؟
هز راسه.
قلت:
— إنك فاكر إن المشكلة كانت السفر.
لكن الحقيقة…
المشكلة كانت الاختيار.
كل مرة…
كنت بتختار أمك.
وتسيبني.
كل مرة كنت بتختار راحتهم…
على كرامتي.
وكل مرة كنت بتطلب مني أفهم…
من غير ما مرة واحدة تطلب منهم يحترموني.
…
مد إيده يمسكني.
رجعت خطوة لورا.
قلت:
— متلمسنيش.
وقف مكانه.
كأن الكلمة وجعته.
لكن وجعه…
ما كانش يساوي نقطة من اللي عشته.
…
في اللحظة دي…
المحامية دخلت البيت.
كانت جاية في الموعد اللي اتفقنا عليه.
أخرجت مجموعة أوراق من الشنطة.
وقالت:
— دي قائمة بالمستندات الخاصة بتقسيم الممتلكات، ودي جلسة التسوية قبل المحكمة.
أمه صرخت:
— تقسيم إيه؟! ابني اللي صارف عليها عمره كله!
المحامية ابتسمت.
وقالت بهدوء:
— الحقيقة… بعد مراجعة الحسابات، الصورة مختلفة تمامًا.
