حيواني الاليف حكـايـات أسمـا السـيد 2

الجزء الرابع الكلمة دي... وقفت الزمن. بصيت للمحامي وقلت: — واحد من العيلة؟ هز راسه. وسحب ورقة من الملف. — العامل اعترف قبل ما يختفي إنه أخد فلوس من شخص من البيت... علشان يهرب نونو وما يقولش لحد. قلت بسرعة: — مين؟ رد بهدوء: — لسه مش متأكدين. ... رجعت البيت لأول مرة... والهدوء كان مخيف. الصالة اللي كانت مليانة ضحك وسخرية... بقت فاضية. أكواب القهوة لسه مكانها. والطبق اللي حاولوا يجبروني آكل منه... لسه على السفرة. بصيت له ثواني... ورميت كل اللي عليه في كيس القمامة. مش علشان الأكل... علشان الذكرى. ... وأنا طالعة أوضتي... سمعت صوت خفيف جاي من المخزن. استغربت. المفروض البيت فاضي. مسكت عصاية كانت جنب الباب... وقربت بهدوء. فتحت الباب مرة واحدة. اتفاجئت بأخت جوزي... قاعدة على الأرض. وشها شاحب. وأول ما شافتني... انهارت في العياط. قالت: — ماتبلغيش عني... أرجوكي. قلت ببرود: — إنتِ جاية تعملي إيه هنا؟ قالت وهي بتمسح دموعها: — أنا غلطت... بس مش أنا اللي بدأت. ... قعدت قدامها. وقلت: — اتكلمي. قالت: — أخويا عمره ما حبك. الكلمة دي... ما وجعتنيش. كنت عارفاها من زمان. لكنها كملت: — هو اتجوزك علشان الورث. ولما عرف إن جدتك كتبت كل حاجة باسمك... قرر يستنى لحد الجواز. وبعدها يبدأ يضغط عليكي. قلت: — وكنتي عارفة؟ وطت راسها. — من أول يوم. ... حسيت بغصة. قلت: — وسكتي؟ قالت: — كنت فاكرة إنه هيخوفك بس... مكنتش أعرف إنه هيوصل للتزوير. ولا إنه هيحبسك... ويهددك. ولا اللي حصل لنونو. ... أول ما جابت سيرة نونو... قربت منها. — تعرفي هي فين؟ هزت راسها بسرعة. — آه. قلبي دق بعنف. — فين؟ قالت: — في مزرعة قديمة... على أطراف البلد. أخويا دفع للعامل فلوس... وقال له يخبيها هناك... لحد ما تخلصوا من موضوع الأرض. ... ما استنيتش ثانية. أنا والمحامي... ورجال الشرطة... اتحركنا فورًا. المزرعة كانت مهجورة. الباب الحديد متآكل. والزرع ناشف. لكن أول ما دخلت... سمعت صوت مألوف. "هاااااا..." وقفت مكاني. دموعي نزلت لوحدها. الصوت اتكرر. وبعدين... جريت. ولقيتها. نونو. واقفة في ركن صغير... أول ما شافتني... جريت بأقصى سرعة... ورفرفت بجناحيها... ولفت حواليا وهي بتصدر نفس الصوت اللي كانت بتعمله كل يوم لما أرجع من الشغل. حضنت رقبتها... وقعدت أعيط. الضابط ابتسم وقال: — واضح إنها كانت مستنياكي. ... العامل كان مستخبي جوه المزرعة. أول ما شاف الشرطة... استسلم. ومن غير مقاومة... قال: — أنا هقول كل حاجة. أنا اللي خدت نونو... بس والله ما كنت ناوي أأذيها. أنا نفذت أوامر. سأله الضابط: — أوامر مين؟ رد من غير تردد: — جوزها. هو اللي دفعلي. وقال: "لو الست مضتش... هنخليها تفتكر إن الوزة ماتت." ... بعد يومين... اتجمعت كل الأدلة. التزوير. التهديد. محاولة الاستيلاء على الأملاك. والاحتجاز والإكراه. كل واحد حاول ينقذ نفسه... فكشف اللي على التاني. وفي أول جلسة... وقف جوزي يبصلي. كانت أول مرة أشوفه... من غير غرور. قال بصوت مكسور: — سامحيني. بصيت له بهدوء. وقلت: — يوم ما كنت بقولك سيبني في حالي... كنت تقدر تمنع كل ده. أما دلوقتي... فالقضاء هو اللي هيقول كلمته. لفيت ضهري... وخرجت من القاعة. ونونو ماشية ورايا... تطلق صوتها العالي... وكأنها هي كمان... كانت بتودع آخر فصل... من أسوأ حكاية عشتها في حياتي. الفصل الأخير... بعد سنة عدت سنة كاملة... وأول مرة من سنين... صحيت من النوم... من غير ما أخاف حد يفتح باب أوضتي. الأرض رجعت باسمي. والشركة كسبت الق\ضية. وكل التوكيلات المزورة... اتلغت رسمي. أما البيت... فضل زي ما جدتي كانت بتحلم. ما اتباعش... ولا اتقفل... ولا حد قدر يمد إيده عليه. ... نونو... بقت أشهر وزة في البلد. كل صباح... كانت تستقبلني عند باب البيت. ولو اتأخرت خمس دقايق... تفضل تلف في الجنينة وتزعق لحد ما أوصل. الجيران كانوا يضحكوا ويقولوا: — دي بتحبك أكتر من البشر. وأنا كنت أبتسم... وأقول: — لأنها عمرها ما عرفت الخيانة. ... في يوم... وصلني جواب من السجن. كان من جوزي السابق. فتحته بعد تردد. كان كاتب: "كل يوم بفكر في اللحظة اللي مدّيت فيها إيدي عليكي... واللحظة اللي حاولت أسرق فيها حقك... كنت فاكر الفلوس أهم من أي حاجة... وخسرت كل حاجة." قريت الرسالة للنهاية... وطويتها. من غير ما أرد. في ناس... أفضل رد عليهم... هو الصمت. ... بعد أسبوع... المحامي زارني. وقال وهو بيضحك: — فاكرة أول ق\ضية جتلك؟ قلت: — أنساها إزاي؟ طلع مفتاح صغير من جيبه. وقال: — فيه مخزن قديم تابع للأرض... اكتشفناه أثناء حصر الممتلكات. روحوا افتحوه. يمكن تلاقوا حاجة. ... روحت. فتحت الباب الخشب القديم. ريحة الزمن خرجت منه. كان مليان صناديق قديمة. وصور. وأدوات زراعة. وفي آخر المخزن... صندوق خشب صغير. عليه اسم جدتي. فتحته بإيديا المرتعشة. لقيت رسالة. كان مكتوب فيها: "لو بتقري الكلام ده... يبقى أنا خلاص مش موجودة. عارفة إن الناس هتطمع. وعارفة إنك هتتعبي. بس أوعي تبيعي الأرض. الأرض مش مجرد تراب... دي كرامة. ولو حافظتي عليها... هتحافظ عليكي." حضنت الرسالة... وبكيت. مش من الوجع... لكن لأن لأول مرة... حسيت إن جدتي كانت معايا طول الطريق. ... خرجت من المخزن. وقفت أبص للأرض الواسعة. الشمس كانت بتغيب. والهوا بيحرك الزرع. ونونو واقفة جنبي... هادية. ابتسمت... وقلت بصوت واطي: — خلصت يا ستي... حقك رجع. وفي اللحظة دي... عرفت إن أقسى المعارك... مش اللي بننتصر فيها على الناس... لكن اللي بننجح فيها نحافظ على نفسنا... من غير ما نبقى شبههم. الخاتمة بعد شهور قليلة... اتحول البيت... اللي كان شاهد على الإهانة والتهديد... إلى بيت مليان حياة. فتحت أبوابه لكل محتاج. وبقى جزء من الأرض مخصص لتعليم الأطفال الزراعة ورعاية الحيوانات. كنت كل يوم أشوف الابتسامة على وشوشهم... وأفتكر إن الخير... عمره ما بينتهي مهما حاول الشر ينتصر. أما أفراد العيلة... فكل واحد فيهم دفع تمن اختياراته. بعضهم خسر حريته... وبعضهم خسر سمعته... وبعضهم عاش باقي عمره وهو بيتمنى يرجع الزمن دقيقة واحدة. لكن الزمن... عمره ما بيرجع. وفي أول ذكرى لجدتي... وقفت قدام قبرها. حطيت باقة ورد أبيض... وقلت بابتسامة: — وصيتك اتنفذت. الأرض لسه مكانها... والبيت لسه عامر... ولا حد قدر ياخد حقنا. رجعت البيت. ولقيت نونو مستنياني عند الباب... زي عادتها. جريت عليا وهي بتصدر صوتها المعروف. ضحكت... وشلتها بين إيديا. وفي اللحظة دي... حسيت إن ربنا عوضني عن كل دمعة نزلت مني. لأن العدل... يمكن يتأخر. لكن عمره ما بيضيع. وإن الإنسان... مهما تعرض للظلم... لو تمسك بحقه... وصبر... هييجي اليوم اللي يقف فيه مرفوع الرأس. وده كان أكبر درس خرجت بيه من الرحلة دي. لو في حد ظلمك... ما تستعجلش الانتقام. خلي الحقيقة هي اللي تتكلم. لأن الكذب... له صوت عالي... لكن الحقيقة... هي الوحيدة اللي بتفضل واقفة لما كل الأصوات تسكت. تمت بحمد الله. ✍️ الكاتبة أسما السيد النهاية. ✍️ تمت.

مقالات ذات صلة

اخت جوزي حكـايـات أسمـا ×3

بيلا حكـايـات أسمـا ×1

جوزي الطيار حكايات اسما السيد 4

زين حكـايـات أسمـا ×3 الاخيره

تحدي الكرامه حكـايـات اسما ×1

غرفةللعمليات حكايا اسما

اترك تعليقاً إلغاء الرد