عمر كامل حكـايـات أسمـا السـيد
قريت الرسالة أكتر من مرة.
يعني بعد عشر سنين جواز…
وبنت…
وبيت…
بقى القرار في إيد أمه؟
قفلت الموبايل.
ومردتش.
…
تاني يوم الصبح…
الممرضة اللي أخويا جابهالي وصلت.
ست كبيرة في السن…
وشها كله طيبة.
أول ما دخلت قالت:
— متقلقيش يا بنتي… من النهارده أنا معاكي.
الكلمة كانت بسيطة…
لكن فرقت معايا.
لأن أول شخص وقف جنبي بعد الحادث…
كان غريب.
مش جوزي.
…
بعد الضهر…
المحامي جه بنفسه.
فتح الملف قدامي وقال:
— قبل أي حاجة… لازم أسألك سؤال واحد.
بصيتله.
قال:
— إنتِ عايزة تديه فرصة… ولا عايزة تحمي نفسك؟
سكت.
بصيت على بنتي وهي نايمة جنبي.
وافتكرت لحظة خروجه من الباب…
من غير حتى ما يبص وراه.
وقتها أخدت نفس طويل…
وقلت:
— أنا خلاص مش بدور على فرصة…
أنا بدور على أمان لبنتي.
المحامي هز راسه…
وطلع مجموعة أوراق.
وقال:
— يبقى هنبدأ من هنا…
لكن لا أنا…
ولا هو…
كنا نعرف إن بعد أقل من ساعة…
هيحصل شيء هيقلب القض*ية كلها…
ويخلي جوزي نفسه يتمنى لو الزمن يرجع دقيقة واحدة بس قبل ما يسيب البيت.
بعد أقل من ساعة…
سمعنا صوت عربية وقفت قدام البيت.
أخويا بص من الشباك وقال:
— في حد جاي.
افتكرت للحظة إنه رجع تاني.
لكن لما الجرس رن…
طلع واحد لابس بدلة، وفي إيده ملف كبير.
فتح أخويا الباب بحذر.
الراجل قال باحترام:
— أستاذة… أنا من شركة التأمين.
طلب يقابلني.
استغربت.
دخل وقعد قدامي وقال:
— أولًا… ألف سلامة عليكي.
هزيت راسي أشكره.
فتح الملف، وقال:
— بعد مراجعة تقرير الحادث، حضرتك ليكي تعويض مبدئي كبير بسبب الإصابة، ولسه فيه تعويضات تانية هتتحدد بعد انتهاء العلاج.
قبل ما أسأله عن أي رقم…
قال:
— بس لازم التوقيعات تكون من حضرتك شخصيًا… ومحدش يقدر يستلم أي حاجة نيابة عنك.
ابتسمت.
وقعت الأوراق.
الراجل سلّم الملف للمحامي، وقام يمشي.
بعد ما خرج…
المحامي بصلي وقال:
— واضح إن في حد عرف بالموضوع.
مفهمتش قصده.
لكن بعد أقل من عشر دقايق…
الموبايل رن.
المرة دي مش جوزي.
كانت حماتي.
سيبتها ترن.
لكنها فضلت تعيد الاتصال.
لحد ما رديت.
أول ما فتحت…
اتغيرت نبرتها تمامًا.
— يا بنتي… إنتِ عارفة إنك زي بنتي.
ضحكت.
قلت:
— بجد؟
قالت بسرعة:
— أكيد… وإحنا كلنا بنغلط.
