سخرية زوجي حكايات اسما السيد 2
الفصل الثاني: الحقيقة اللي محدش كان متوقعها
أحمد اتجمد مكانه.
ابتسامته اختفت تمامًا.
وبص لندى بسرعة وقال بعصبية:
— يعني إيه اهتمام زايد؟ إنتِ بتقولي إيه؟
ندى أخدت نفس طويل.
وقالت بهدوء:
— بقول الحقيقة… من غير زيادة ولا نقصان.
أخو أحمد، كريم، قرب منها وقال:
— اتكلمي يا ندى.
بصت له وقالت:
— أنا ساكتة من أول الجواز علشان البيت ما يتخربش… لكن بما إن مريم اتكلمت، يبقى لازم أنا كمان أتكلم.
القاعة كلها بقت ساكتة.
حتى الأطفال وقفوا يبصوا للكبار.
قالت ندى:
— من أول أسبوع بعد جوازي… أحمد بقى يبعتلي رسائل على الموبايل.
وش أحمد اصفر.
وقال بسرعة:
— كدب!
طلعت ندى موبايلها من الشنطة.
— كدب؟ طيب دي إيه؟
فتحت الرسائل.
وقربتها من كريم.
كريم خد الموبايل.
وبدأ يقرأ.
كل كلمة كان بيقراها…
وشه كان بيتغير أكتر.
“الفستان ده لايق عليكي.”
“كريم محظوظ بيكي.”
“لو كنت عرفتك قبله كان زمان كل حاجة اختلفت.”
وآخر رسالة…
“مريم اتغيرت بعد الخلفة… لكن إنتِ لسه زي القمر.”
كريم رفع عينه ناحية أخوه.
كان بيبص له وكأنه أول مرة يشوفه.
قال بصوت مخنوق:
— الرسائل دي بعتها إمتى؟
ندى قالت:
— على فترات… وكل مرة كنت أعمل تجاهل.
أحمد صرخ:
— كانت مجرد هزار!
ندى ردت بحزم:
— الراجل المحترم ما يهزرش مع مرات أخوه بالشكل ده.
همسات الناس بدأت تعلى.
واحدة قالت:
— يا ساتر.
واحد تاني قال:
— هو كان بيقارن مراته بيها علشان كده!
حماتهم قامت بعصبية.
— اقفلوا الموضوع ده حالًا!
لكن كريم لف لها وقال:
— لا يا أمي… النهارده لازم كل حاجة تتقال.
مريم كانت واقفة ساكتة.
مش بتعيط.
ولا بتتكلم.
كانت لأول مرة حاسة إن الحمل التقيل اللي فوق صدرها بدأ يخف.
كريم بص لأخوه وقال:
— إنت كنت بتعمل كده وأنا باعتك أجيبها من شغلها لما أتأخر؟
أحمد حاول يقرب منه.
— والله فهمتني غلط.
لكن كريم زقه بعيد عنه.
— ما تلمسنيش.
ندى كملت:
— مش الرسائل بس.
في مرة كنت واقفة في المطبخ…
دخل وقال لي: “إوعي تقولي لمريم إني قلت لك إنك أجمل منها… دي هتزعل.”
الناس شهقت.
وأحمد بقى يلف بعينه في المكان.
كان بيدور على أي حد يدافع عنه.
لكن محدش اتكلم.
حتى أمه…
كانت ساكتة.
مريم أخدت الميكروفون تاني.
وقالت بهدوء:
— أنا عمري ما كنت غيرانة من ندى.
